من حَرزفير القلم گَـبَّت لهاة الوَرَگ

ومن گدونين الشّعرظل يبچي حتّى الوَرَگ

ماتنزل اعْلَى الورگ جُمله الَّابيها وجع

وماتغفا كلمه ابسطر إلَّا لْهَا لوعه وارگ

في كل عباره ألم تلويني من تنكتب

وكل صوره بيها وجع بعظامي صَيْهَاگَرَگ

تنّورصدري اشتيرواضْلوعي صارت حطب

وادْمومي الك بكبكت بعروگي مثل المرگ

اجمدواذوبن الك واگرس الك والتهب

واضحك وارد انتحب مِنّي اتّزاني انسرگ

لقمان واتْعومَسِت بيك وفگدت الحِكَم

زيبگ كَأَنّ العگل من چف دماغي انزرگ

أرسم حضورك حلم واشهدغيابك ملح

وبين الملح والحلم بجروحي يسمط عرگ

ازرع وصالك أمل واحصد فصالك ألم

وبين الألم والأمل نصّين گلبي انشرگ

غبت وضياء المُقَل غاب وعلَيّ الدَّرب

ظلمه ويعودالبصرلونوروجهك شَرَگ 

يلچعني هجرك واشب دونك واصيرن خفت

واخلص واعوداحتيي لوطيف مِنّك مرگ

رغم اللهيب ابْثلج بُعدك دليلي گرس

ورغم المراره حلگ صبري ابحلاتك شرگ

لمّن لفاني الـ عشگ شِغْف الدّليل انـ ـگشَع

وبين الـ ـگَشِع والـ ـعشِگ واگف على المُفترگ

صارالتناقض فلِم بيَّ وهواك انتشر

مهماكتمت العشگ بعيوني شوگك برگ

بين اهلي وابْغَصِّتَك ظهرت عَلَي غُصِّتك

اكتب وجع قِصِّتك وابْيَمهافكري غرگ

سكران بيك ونزل عَالْورگه دمعي جمر

وصاحَوْعلَيّ انتبِهْ گب دفترك واحترگ

ك.محمدابوعمارالحزباوي

2018/8/23م